Nos Guichardus, miseratione divina Matisconensis episcopus, notum facimus universis presentes litteras inspecturis, quod domina Aliz de Porperes, relicta domini Durandi de Marcheant, et Lodovicus de Marchant, nepos ejus, coram venerabili viro domino Thoma de Fougeriis, canonico Matisconensi, de mandato nostro ad hoc a nobis specialiter destinato constituti, sponte, scientes et prudentes, vendunt, tradunt et quasi, ac titulo pure et perfecte venditionis perpetuo possidendum cedunt et concedunt venerabilibus et religiosis viris Yvoni, abbati, et conventui Cluniacensi et eorum successoribus in futurum, viginti novem solidos et tres denarios Cluniacenses, tres panellos frumenti, sex panellos et unam quartam avene et quatuor gallinas annui canonis que habent in hominibus de Sancto Poncio; item medietatem ejusdem nemoris quod dicitur Nemu[s] Francum, quod participat cum Jacobo de Barberesches, et quartam partem alterius nemoris quod partitur cum dictis religiosis et Jacobo supradicto, et tailliam quatuor solidorum Cluniacensium, quam in tenemento quondam Nicholas habent in triginta sex jornalia terre arabilis sita in parrochia Sancti Poncii predicti, et quicquid habent vel habere possunt in dicta parrochia Sancti Poncii, Matisconensis dyocesis, in planis, terris, nemoribus, serviciis, pratis, hominibus, usagiis, rebus et juribus aliis quibuscunque et quocunque nomine censeantur, precio centum et decem librarum Viennensium, quam pecunie summam confessi sunt coram dicto mandato nostro se recepisse et habuisse integraliter a religiosis viris predictis, in pecunia numerata; devestientes se iidem venditores de predictis rebus venditis, etc. In cujus rei testimonium nos dictus episcopus, ad instanciam et preces dictorum venditorum nobis oblatas per dictum mandatum nostrum, cui fidem super his adhibendum, sigillum nostrum presentibus duximus apponendum. Datum anno Domini M^o CC^o septuagesimo, mense februarii.